¹Го́споди, не лиши́ менé небéсных Твои́х благ. ²Го́споди, изба́ви мя вéчных мук. ³Го́споди, умо́м ли или помышлéнием, сло́вом или́ дéлом согреши́х, прости́ мя. ⁴Го́споди, изба́ви мя вся́каго невéдения и забвéния, и малоду́шия, и окаменéннаго нечу́вствия. ⁵Го́споди, изба́ви мя от вся́каго искушéния. ⁶Го́споди, просвети́ моé сéрдце, éже помрачи́ лука́вое похотéние. ⁷Го́споди, аз я́ко человéк согреши́х, Ты же, я́ко Бог щедр, поми́луй мя, ви́дя нéмощь души́ моея́. ⁸Го́споди, посли́ благода́ть Твою́ в по́мощь мне, да просла́влю и́мя Твоé свято́е. ⁹Го́споди Иису́се Христé, напиши́ мя раба́ Твоего́ в кни́зе живо́тней и да́руй ми конéц благи́й. ¹⁰Го́споди Бо́же мой, а́ще и ничто́же бла́го сотвори́х пред Тобо́ю, но даждь ми по благода́ти Твоéй, положи́ти нача́ло благо́е. ¹¹Го́споди, окропи́ в сéрдце моéм ро́су благода́ти Твоея́. ¹²Го́споди небесé и земли́, помяни́ мя грéшнаго раба́ Твоего́, сту́днаго и нечи́стаго, во Ца́рствии Твоéм. Ами́нь.

      ¹Го́споди, в покая́нии прии́ми мя. ²Го́споди, не оста́ви менé. ³Го́споди, не введи́ менé в напа́сть. ⁴Го́споди, даждь ми мысль бла́гу. ⁵Го́споди, даждь ми слéзы, и па́мять смéртную, и умилéние. ⁶Го́споди, даждь ми по́мысл исповéдания грехо́в мои́х. ⁷Го́споди, даждь ми смирéние, целому́дрие и послуша́ние. ⁸Го́споди, даждь ми терпéние, великоду́шие и кро́тость. ⁹Го́споди, всели́ в мя ко́рень благи́х, страх Твой в сéрдце моé. ¹⁰Го́споди, сподо́би мя люби́ти Тя от всея́ души́ моея́ и помышлéния и твори́ти во всем во́лю Твою́. ¹¹Го́споди, покры́й мя от человéк нéкоторых, и бесо́в, и страстéй, и от вся́кия ины́я неподо́бныя вéщи. ¹²Го́споди, вéси, я́ко твори́ши, я́коже Ты во́лиши, да бу́дет во́ля Твоя́ и во мне грéшнем, я́ко благословéн еси́ во вéки. Ами́нь.