Piekfyn Afrikaans Graad 9 Leerderboek vir Eerste Addisionele Taal. Henk Viljoen
Читать онлайн книгу.
woorde, liedjies word herhaal om belangrike dele uit te lig.
Groepbegeleide lees
Beurtlees die verhaal “Melina sing ’n noot” in jou Piekfyn Afrikaans Leesboek. Beantwoord die volgende vrae in julle groepe.
•Dink julle die verhaal is ’n tipiese kortverhaal of ’n volksverhaal?
•Wie is die hoofkarakter in die verhaal?
•Wat was die hoofkarakter se droom?
•Word daar van herhaling in die verhaal gebruik gemaak? Gee voorbeelde.
•Wil hierdie verhaal vir die leser ’n les leer? Hoekom sê julle so?
•Was hierdie verhaal vir julle humoristies (snaaks)? Hoekom sê julle so?
•Het Melina se droom waar geword? Verduidelik.
Skryf jou eie storie
Jy het die verhaal “Melina sing ’n noot” gelees en daaroor gesels. Skryf nou vir huiswerk jou eie kort storie oor ’n fiktiewe karakter en gebeure. Jou verhaal moet ongeveer drie (3) bladsye (± 20 paragrawe) lank wees. Jou onderwyser kan dalk besluit om dit formeel te assesseer.
(Kwartaal 1: Week 3 en 4)
Almal hou van die taal van musiek
Wat gaan jy leer?
Almal hou van musiek, maar nie almal hou van dieselfde soort musiek nie. Hierdie module begin met ’n luisterbegripsoefening oor musiek en ’n mondelinge aanbieding oor jou gunstelingliedjie of -musikant en jy maak ’n dagboekinskrywing. Jy doen weer ’n luisteroefening en berei ’n teks voor vir hardoplees. Jy skryf twee briewe: ’n uitnodigingsbrief en ’n brief van waardering.
Jy gaan lees van liedjies en musikante. Jy doen ook ’n leesbegripsoefening om leesbegripstrategieë in te oefen. Ons almal ken ’n vuvuzela – lees ’n uittreksel uit ’n jeugroman Vuvuzela om letterkunde beter te verstaan. Dan is dit weer tyd om ’n gedig te lees en vir die inskerping van verskeie taalstrukture. Jy moet ’n spotprent en ’n paar advertensies ontleed om jou kyk- en taalbegrip te bevorder. Jy sluit die module af met selfstandige lees – geniet die verhaal “Die goue kitaar”.
| Aktiwiteit 1: Luister na ’n voorlesing |
| In hierdie aktiwiteit gaan jy |
| •Luister en praat•aandagtig luister na ’n leesteks•notas maak•vrae beantwoord. |
Jou onderwyser gaan ’n teks oor musiek aan jou voorlees. Onthou jy die stappe van die luisterproses? Lees die stappe hieronder.
Luisterproses
•Jou onderwyser gaan eers die teks lees. Jy moet net luister.
•Dan gaan jou onderwyser die vrae saam met jou lees en verduidelik.
•Jy gaan weer na die leesstuk luister. Jy mag dan notas afneem.
•Jy gaan dan die vrae in jou werkboek beantwoord.
| Beantwoord die volgende vrae in jou werkboek. | |
| 1. | Die storie oor die geskiedenis van musiek begin met die woorde “Waar het musiek begin?” Watter twee moontlikhede noem die skrywer waar musiek kon begin het? (2) |
| 2. | Wat word in Afrika tradisioneel geglo is die ontstaan van musiek? (1) |
| 3. | Noem drie soorte tradisionele danse van die Amerikaanse Indiane. (3) |
| 4. | Wat is ’n “argeologiese vonds”? (1) |
| 5. | Wanneer is iets “antiek”? (1) |
| 6. | Waarop dui die verwysings na musiekinstrumente en liedere in die Bybel? (1) |
| 7. | Wat dink jy word met “natuurgebonde gemeenskappe” bedoel? (1) |
| (Totaal: 10 punte) | |
| Formele assessering: Jou onderwyser kan hierdie luistertoets formeel assesseer. |
| Aktiwiteit 2: Lewer ’n praatjie en skryf |
| In hierdie aktiwiteit gaan jy |
| •Luister en praat•Skryf en aanbied•Taalstrukture en -konvensies•’n foto-collage saamstel en daaroor praat•’n dagboekinskrywing maak•sinsoorte inoefen. |
Die Idols-kompetisie is wêreldwyd bekend. Suid-Afrika het ook al ’n klompie Idols-sangsterre. Dink maar aan deelnemers soos Heinz Winkler, Brandon October, Elvis Blue, Karin Kortje, Crushanda Forbes, Dave van Vuuren en nog baie ander. Wie was jou gunsteling?
Lees die onderstaande teks saam met jou maat deur.
Platinum vir Elvis Blue
Johannesburg – Byna ’n jaar nadat Elvis Blue tot die Idols-wenner gekroon is, het hy die eerste Idol geword wie se eerste album ná die kompetisie platinumstatus bereik het. “Ek sou dit in my wildste drome nie kon dink nie,” het hy gister gesê.
Want nie so lank gelede nie, het Jan Hoogendyk, toe nog nie bekend as Elvis Blue nie, gesukkel om ’n sangloopbaan (singing career) te begin. Hy het selfs daaraan gedink om op te hou sing. In dié stadium het hy en sy vrou, Chireze, in George gebly. “Sy het by ’n Hospice gewerk en daar was ’n seuntjie, Elvis Blaauw (10), wat van geboorte af ’n vigslyer was. Ek het baie vir dié seuntjie gaan sing. Hy wou so graag keyboard speel.
“Ons het altyd gespot en gesê hy het die beste stage-naam, ons sal dit net na Elvis Blue verander. Myne sal nie werk nie, want ek is Jan Hoogendyk.”
Hy bly ’n rukkie stil voordat hy sê: “In die middel van sy 11de jaar is hy dood. Toe ek ’n Idols-naam moet kies, was daar nie twyfel nie dat dít die beste naam sou wees.” Hy het ’n maand nadat hy as die wenner aangewys is die album Elvis Blue uitgereik, óók ’n eerste vir ’n Idols-wenner.
In die 12 jaar voor die Idols-kompetisie het ’n paar albums nie verkoop nie, maar nou gaan hy ’n groot partytjie hou, het Hoogendyk opgewonde gesê. Maar tyd vir niksdoen is daar nie eintlik nie.
Hoogendyk het beplan om sy musiek-akademie van Alexandra na Zandspruit te skuif en dan konserte te hou. Boonop is hy aangewys as ambassadeur vir die 46664-armband-projek. Daarby is hy reeds besig om aan sy nuwe album te werk wat hopelik vroeg in 2012 op die rakke sal wees.
“Ek het die afgelope jaar baie geskryf. Hierdie week neem ek saam met Dan Patlansky, ’n ou vriend, ’n liedjie of wat op en sal in die nuwe jaar die beste liedjies vir die nuwe album kies.”
(Verwerk van Nuus24. November 2011)
Mondelinge aanbieding
Stel ’n foto-komposisie (collage) saam van jou gunsteling Idols-wenner of enige ander sanger/
sangeres. Die komposisie moet die kyker meer inligting gee oor wie die ster is soos die berig oor Elvis Blue. Berei ’n mondelinge aanbieding oor die foto-komposisie voor. Jou praatjie moet 2 tot 3 minute duur.
Onthou ook die volgende vir hierdie opdrag:
•Die foto-komposisie moet duidelik en interessant wees.
•Versamel genoeg inligting.
•Ontwikkel ’n raamwerk vir jou praatjie en neem die tydsduur (2 tot 3 minute) in ag.
•Oefen jou praatjie voor ’n spieël, voor een van jou vriende of jou ouers.
•Praat met entoesiasme en selfvertroue.
Pitkos