Suster Lilian se babasorgboek: Tradisionele en natuurlike sorg. Lilian Paramor
Читать онлайн книгу.
skei ’n bietjie bloed uit die vagina af. Dit is ’n reaksie op die hormone waaraan sy blootgestel was in die baarmoeder en sal gou opklaar.
•Gaan voort om die naeltjie en naelstringstompie skoon te maak. Dit sal binnekort afval of nog net aan ’n draadjie hang, wat jy kan afknip.
•As Baba gereeld windjies boontoe én ondertoe laat, met ’n rooi gesiggie huil, sy vuisies bal en sy bene optrek, mag jy dalk begin vermoed dat hy koliek het. Koliek is meestal bloot ’n geval van ’n baba wat meer dikwels moet drink, of ’n reaksie op Ma se angstigheid, moegheid en gebrek aan ervaring. Die heel beste wat jy kan doen, is om die volgende paar dae rustig te benader, besoekers te beperk, te sorg dat Baba nie deur te veel mense vasgehou word nie aangesien dit hom onrustig kan maak, en te ontspan in die wete dat jy binnekort sy seine goed sal leer verstaan.
•Borsbabas moet hul voeding dikwels in ’n hele paar “gange” geniet – voorgereg, hoofgereg, nagereg, en soms selfs ’n pepermentjie agterna! Moenie begin twyfel of jy genoeg melk het nie. Baba mag miskien 10–15 minute lank tussen “gange” aan die slaap raak, ’n skoon doek nodig hê of bloot in jou arms lê en rus tot sy magie gereed is vir die volgende gang.
Wenke vir Ma
•Sorg dat jy een onkritiese familievriendin of familielid het om jou by te staan, en aanvaar ook hulp en ondersteuning van jou lewensmaat.
•Dokter jouself minstens 3 maal per dag met homeopatiese Rescue Emotion-tablette.
•As jou tepels gevoelig is of as jy baie lig van vel is, sal dit help om jou borste 2 maal per dag 5–10 minute lank aan sonlig bloot te stel, maar sorg dat jy nie brand nie.
•As die situasie vererger eerder as verbeter of as jy steeds sukkel om Baba te laat vassuig, kan jy hulp vra by ’n voedingsraadgewer. Dit is beslis die moeite werd, want dit kan sorg dat die res van jou borsvoedingservaring baie positief verloop.
•Moenie bekommerd wees dat jy jou baba sal versmoor as sy saam met jou in jou bed slaap nie. Trek haar net koeler aan, aangesien sy aan jou liggaamshitte blootgestel word. ’n Slapie saam is dalk net wat julle albei nodig het om die volgende paar dae te oorleef.
DAG SEWE, AGT EN NEGE
Veels geluk, Baba is ’n volle week oud! Almal in die huis gaan moontlik van nou af deeglik van sy teenwoordigheid bewus word. Babas is besonder selfbehep en selfgesentreerd, omdat dit al is wat hulle ken. Hulle verwag van hul ouers om die leiding te neem en hulle in die moets en moenies van die gesinslewe in te lei – wat nogal veel gevra is as jy self wens jy het ’n helpende hand gehad! Dit het nou tyd geword om jou baba te begin dophou om sy herhalende gedragspatrone en uitdrukkingswyses te identifiseer – dit is jou leidrade oor hoe om dié unieke klein mensie te hanteer.
Meer oor Baba
Gebruik hierdie beproefde wenke as jou baba veeleisend, vitterig, knieserig en onrustig is.
•Vra jou lewensmaat of ’n familievriend om jou 2 uur lank te laat rus ná ’n voeding deur Baba op te pas. Hy sal nie so gou weer honger raak nie, en ’n wandeling in die tuin of om die blok terwyl jy rus, kan dalk help om die bose kringloop te verbreek.
•Bad saam met jou baba. Speel agtergrondmusiek en laat haar drink tot sy kalmeer, terwyl jy haar lyfie teen jou vashou en haar met ’n waslap bedek wat die warm badwater sal absorbeer. Sorg dat haar onderste oor nie onder die water is nie, maar moenie bekommerd wees dat sy uit jou arms sal glip nie – jou instink sal dit voorkom.
•As sy van die bors af wegdwing of haar kop vinnig heen en weer draai, kan jy haar kop liggies in jou hand vashou en aan jou bors in posisie hou.
•Verbreek die spanning in haar arm as sy haar lyfie van jou af wegdruk deur haar jou vinger te laat vasgryp.
•Stap rond terwyl jy Baba laat vassuig en hou aan beweeg tot jy die lyfie voel ontspan. Daarna kan jy gaan sit om verder te voed.
•Druk homeopatiese Sister Lilian Chamomilla-tablette fyn, voeg ’n bietjie melk by of gee 3 maal per dag met ’n skoon vinger om Baba natuurlik te laat ontspan.
Wenke vir Ma
•Sorg dat jy genoeg vloeistof inneem, verkieslik in die vorm van water, rooibostee en flou kamilletee. Maak ’n fles op ’n slag en hou dit byderhand terwyl jy borsvoed, aangesien jy dan dorser sal raak.
•Neem kennis van enige bekkenpyn, veral gepaard met ’n onwelriekende vaginale afskeiding en koors. Dit mag ’n teken van infeksie wees of dat daar ’n stukkie plasenta in die baarmoeder agtergebly het. Raadpleeg jou vroedvrou of dokter as hierdie simptome voorkom.
•Bespaar jou energie deur bevrore gaar maaltye te gebruik of enige hulp in dié verband met dank te aanvaar – dit is een terrein waarop vriende en familie van groot hulp kan wees.
•Bederf jouself met ’n tuispedikuur terwyl iemand anders na Baba kyk – jy sal sommer beter voel, en dis wonderlik om weer aan jou tone te kan raak!
DAG TIEN
Dit is ’n besondere mylpaal op die ouerskapskalender – selfs al voel jy nog moeg en is Baba steeds veeleisend, voel jy waarskynlik al minder soos ’n groentjie. Baie vroue sal weer die buitewêreld wil aandurf om met hul baba te gaan spog en geniet die feit dat dit makliker gaan om te loop en te sit, aangesien die perineum waarskynlik teen dié tyd mooi genees het as jy die wenke gevolg het.
Meer oor Baba
•Roetine is belangrik vir jou én vir Baba, maar sorg dat sy die pas aangee. Danksy jou waarnemings die afgelope paar dae weet jy moontlik teen dié tyd al hoe dikwels jou baba verkies om te drink – die patroon sal heel waarskynlik intervalle van 2 uur vertoon, met een of twee langer periodes elke 24 uur. Enkele babas drink klokslag dwarsdeur die dag en nag. Laat jou lei deur hierdie aanpasbare patroon en bou jou roetine daar rondom.
•Baba kan enige tyd van die dag gebad word, maar probeer om dit elke dag op dieselfde tyd te doen. Voor ’n voeding en ná ’n langerige slapie is ’n goeie tyd, aangesien sy dan baie ontspanne is.
•Let op of daar ’n besonder moeilike tyd van die dag is en sorg dat jy dan so min moontlik roetinetake hoef te verrig. Borsvoed eerder dikwels, gaan stap met Baba of laat Pa ’n rukkie oorneem tot jy meer uitgerus voel.
•Ondersoek die tong, tandvleis en binnekant van die wange vir tekens van sproei as Baba sukkel om te drink: dit lyk soos opgehewe, dik wit kolletjies. Dit moet met ’n orale swamdodende jel, homeopatiese Sister Lilian Calendula-tablette of die weefselsout Kali. mur. behandel word. Jy sal ook jou tepels met swamdodende room moet behandel, aangesien kruisbesmetting ’n gevaar is.
•Leer jou baba se liggaamstaal lees, wat uit fisieke gebare en verskillende soorte huil bestaan. As Baba deurdringend huil, gewoonlik ná ’n voeding, en rooi in die gesig raak, is dit dalk sy manier om te sê: “Ek is gefrustreerd en sommer baie vies, Ma! Ek moet nog ’n bietjie langer drink voor dié sessie verby is. Moenie van my verwag om alles binne een of twee gange in te kry nie. En moenie dit koliek noem as ek dan huil nie!” Dié soort baba sal eiesinnig en intens voorkom, maar sal dikwels heel tevrede wees tussen voedings. As hy baie winderig is en heelwat melk opbring, sal hy dalk goed reageer op behandeling met homeopatiese middels soos NausiCare of ColicCare.
Wenke vir Ma
•Al voel jy meer energiek, moet jy nog steeds nie te veel probeer doen nie. Gaan dag en nag voort om jou energie te bespaar en rus bedags kort-kort. Moet ook nie te veel huishoudelike take probeer afhandel nie.
•Jy sal moontlik vandag bloedklonte uitskei en skielik meer bloei. As die bloeding binne ’n paar uur verbygaan en jy geen pyn of koors het nie, is daar geen rede tot kommer nie. As jy egter sleg voel en aanhoudend sterk bloei, moet jy so gou moontlik met jou vroedvrou of dokter in verbinding tree.
•Laat jou lewensmaat jou na ’n babavriendelike restaurant uitneem vir tee en geniet die bewonderende blikke wat jou baba ontlok.
•As