Boos en Bisar. Chris Karsten
Читать онлайн книгу.
brief lui onder meer: “Mnr. die President, ek kan nie die omvang van die hartseer en lyding wat ons ervaar, aan u verduidelik nie. Dit is die gevoelens wat so baie ander in soortgelyke trauma moes verduur nadat hulle geliefdes in die onbeheerste misdaadsituasie in Suid-Afrika verloor het.
“As iemand wat die wreedhede van apartheid gesien en ervaar het, weet ek u sal empatie hê. Brett se dood en die sinlose moord op ander onskuldige mense kon maklik verhoed word as misdaad boaan die nasionale agenda was en ernstig opgeneem is.
“Dit is tyd dat die verskonings stop. Hoekom word misdaad nie ernstig opgeneem nie? Waar is dit op die agenda? Waar is die hulpbronne?
“Ek is hier om u by te staan op enige manier wat ek kan, mnr. die President. Ek sal saam met u baklei.”
Op 5 Maart 2007 is daar weer ’n groot betoging teen misdaad in Kaapstad. Dit is die dag waarop die verhoor van Shawaan Marlie en Clinton Davids in die Kaapse hooggeregshof sou begin. Die verhoor word uitgestel tot in Mei sodat hul pleitooreenkomste afgehandel kan word.
Denise Goldin sê sy is verbyster oor die uitstel. “Ek wens dit was nog dié tyd verlede jaar toe Brett én my man nog geleef het. Hy [haar man, Peter] was gesond, maar het Brett se dood só swaar verwerk dat hy aan ’n beroerte gesterf het. Hy kon nie die verlies van sy seun hanteer nie.
“Hul dood is soos ’n groot swart gat in my waarom ek moet leef. Ek wil hê geregtigheid moet geskied sodat my seun en Richard in vrede kan rus.
“Ek is teleurgesteld met die uitstel omdat ek gehoop het dat ons dinge kan begin afsluit. Ek doen ’n beroep op [pres.] Thabo Mbeki om te luister na wat sy mense sê.”
Op 21 Mei 2007 luister Brett en Richard se ouers en familie en vriende in die hof toe Shawaan en Clinton se pleitverduidelikings voorgelees word.
Denise sê later sy het, terwyl sy geluister het, “elke laaste asemteug van my seun saam met hom herleef. Ek het sy dood gedeel, sy laaste oomblikke ervaar.”
Ná die pleitooreenkoms bevind regter John Hlophe Shawaan en Clinton skuldig op twee aanklagte van moord, twee van menseroof, twee van roof met verswarende omstandighede en aanklagte wat verband hou met die onwettige besit van ’n vuurwapen en ammunisie. Hy vonnis albei tot 28 jaar effektiewe tronkstraf.
Die doodsrit
Uiteindelik weet die ouers wat daardie Paassondagoggend net ná middernag gebeur het toe Brett en Richard van Craig Port se huis in Bakoven weggestap het.
Shawaan Marlie bestuur sy BMW waarin hy, Clinton Davids, Jade Wyngaard en Nurshad David die Saterdagaand laat uit die middestad van Kaapstad in die rigting van Kampsbaai ry, op soek na ’n voertuig om te steel.
Clinton Davids en Shawaan Marlie verlaat die hof ná die vonnisoplegging
images24.co.za/Die Son/Peter Abrahams
Shawaan en Jade het elkeen ’n semi-outomatiese 9 mm-CZ75.
Net ná middernag sien hulle Brett en Richard in Victoriaweg in Bakoven.
Clinton sê hulle moet die twee mans beroof en hul kar steel, die donkerkleurige Polo. Hulle stop by Brett en Richard.
Die vier klim uit en Shawaan rig sy vuurwapen op Brett en Richard.
Jade deursoek een en Clinton en Shawaan die ander een. Hulle vat hul selfone, ’n kredietkaart en motorsleutels.
Brett en Richard word verskrik in die BMW gedwing, en Jade en Nurshad ry met die Polo agterna. Hulle ry op deur Kampsbaai na Kloofnek en daarvandaan in die rigting van die sweefspoorstasie op Tafelberg.
Op pad trek die twee motors af en almal klim uit. Clinton beveel Brett en Richard om al hul klere uit te trek, ook hul skoene. Hulle hou net hul sokkies aan. Die aanvallers gooi die klere teen die berghang af.
Clinton sê Jade moet hom help om Brett en Richard vas te bind. Die plan is om hulle kaal daar te los.
Maar toe lui Jade se selfoon. Hy skrik en trek ’n skoot met sy vuurwapen af.
Clinton vat die vuurwapen. Maar nou is die aanvallers onrustig oor die skoot in die nag. Hulle is bang iemand ontbied die polisie. Hulle besluit om Brett en Richard elders te gaan los.
Clinton bind Brett en Richard vas en dwing die twee kaal agter in die Polo se bagasiebak.
Shawaan en Clinton ry met Brett en Richard in die Polo weg, en Jade en Nurshad ry met die BMW na ’n huis in Kildastraat in Crawford.
In ’n oop stuk veld met dennebome, naby die afrit van die M5 by Klipfonteinweg, trek Shawaan en Clinton die Polo onder die bome in. Maar toe sit die kar vas. Brett en Richard word uit die bagasiebak gehaal en beveel om die Polo te help stoot.
Hulle kry nie die kar uitgestoot nie.
Brett en Richard word beveel om langs mekaar op hul mae te gaan lê.
Clinton gee ’n vuurwapen na Shawaan en sê hy moet hulle skiet as hulle beweeg. Hy wil bel om hulp te ontbied om die Polo uit te kry.
Skielik skree een, dit is onseker of dit Brett of Richard is. Shawaan begin skiet. Hy skiet elkeen twee keer agter in die kop.
Shawaan en Clinton bel Zubair Davids en Yazeed Eyssen om te kom help met die vasgevalde Polo. Hulle bring Shawaan se BMW om die Polo uit te trek. Hulle het ook ’n graaf en ’n tou. Die tou breek en een sny ’n veiligheidsgordel van die Polo af as tou.
En hulle ry weg, los vir Brett en Richard daar onder die dennebome, reeds dood.
Vyfuur die oggend is Shawaan en Clinton terug in die strate, met Brett se kredietkaart. Rameez Sayeed is saam met hulle toe die polisie hulle omstreeks vyfuur die oggend in Kampsbaai voorkeer.
Shawaan is die pa van ’n babadogtertjie en het vorige veroordelings weens diefstal. Clinton studeer vir sy N4-sertifikaat en het geen vorige veroordelings nie.
Denise Goldin sê sy is tevrede, maar sy sal nooit afsluiting kry nie. “’n Vrou wat haar man verloor, word ’n weduwee genoem. ’n Kind wat sy ouers verloor, is ’n weeskind. Maar as ’n ouer ’n kind verloor, kan jy dit nie beskryf nie. Die pyn is so intens, so ondraaglik.”
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.